د شهیدانو او معلولینو چارو وزارت د څارنې او ارزونې ځانګړي پلاوي په بغلان ولایت کې د یاد وزارت اړوند ریاست د کړنو او فعالیتونو ارزونه وکړه.
د شهیدانو او معلولینو چارو وزارت د څارنې او ارزونې ځانګړي پلاوي چې په هغه کې د مالي او اداري چارو عمومي رئیس مولوي کلیم الله افغان، د داخلي تفتیش رئیس مولوي احسان الله حقاني، د معلولینو چارو رئیس مولوي عبدالنافع منتفع او همدارنګه د ارزونې او څارنې ریاست استازی هم شامل دی، د بغلان ولایت د شهیدانو او معلولینو چارو ریاست فعالیتونه او کړنې یې په هر اړخیزه توګه وارزولې.
د شهیدانو او معلولینو چارو وزارت د مالي او اداري چارو عمومي رئیس مولوي کليم الله افغان د بغلان ولايت د شهيدانو او معلولينو چارو رياست څخه د ارزونې په ترڅ کې د بودیجې د مصرفولو پر څرنګوالي خبرې وکړې او زياته يې کړه: دغه رياست ته ځانګړې شوې بودیجه بايد په بشپړه، شفافه او پر وخت ولګول شي، نوموړی همداراز ټینګار وکړ چې هغو معلولیت لرونکو وګړو او د یتیمانو کورنېو ته چې تر اوسه حقوق او امتیازات نه دي ورکړل شوي د هغوې حقوق باید پر وخت ورکړل شي.
نوموړي همدا راز زیاته کړه، اړوند مسؤلین دې د یتیمانو د وکیلانو له خوا د یتیمانو حقوقو او امتیازاتو د ورکړۍ څرنګوالې وڅیړي تر څو یتیمان خپل حقوق په ښه توګه ترلاسه کړي. نوموړي د اړوند رياست له کارکوونکو وغوښتل، چې له مراجعينو سره ښه چلند وکړي.
د شهیدانو او معلولینو چارو وزارت د مالي او اداري چارو عمومي رئیس سره راغلي پلاوي د معلولینو او یتیمانو د تثبیت په پروسه کې د روڼتیا د معلومولو او همدارنګه د طرحې سره سم د هغوی د حقوقو د ورکړې په برخه کې له یو شمېر یتیمانو او معلولیت لرونکو وګړو سره له نږدې وکتل او د هغوې څخه یې د شهیدانو وارثینو او معلولینو ته د خدمتونو د وړاندې کولو د څرنګوالي په اړه پوښتنې وکړې.
د بغلان ولايت د شهيدانو او معلولينو چارو رئیس قاري عبدالحکيم نافذ هم یتیمانو او معلوليت لرونکو وګړو ته د خدمتونو د وړاندې کولو د څرنګوالي په باب خبرې وکړې او زياته يې کړه: "د يتيمانو او معلولينو د حقوقو پر وخت ورکړه زموږ له کاري لومړیتوبونو څخه دي" نوموړي همداراز په یاد رياست کې د خدمتونو د وړاندې کولو په برخه کې د شته ستونزو او ننګونو يادونه هم وکړه.
د شهیدانو او معلولینو چارو وزارت د مالي او اداري چارو عمومي رئیس مولوي کلیم الله افغان په یاد ریاست کې د شته ستونزو او ننګونو له اورېدو وروسته ژمنه وکړه چې دغه ستونزې او ننګونې به ډېر ژر حل کړل شي.
د يادونې وړ ده چې د دغه وزارت د پلټنو پلاوی به د سرپل، بلخ، سمنګان، او کندز ولايتونو کې د دغه وزارت له اړوندو رياستونو څخه هم څېړنه او ارزونه وکړي.
