د شهيدانو او معلولينو په چارو سرپرست وزیر د ولایتي سفر په ترڅ کې د لغمان ولایت د اسنادو څېړنو کمېسيون غړو،
د شهيدانو او معلولينو په چارو سرپرست وزیر د ولایتي سفر په ترڅ کې د لغمان ولایت د اسنادو څېړنو کمېسيون غړو، مستوفي، د ښارجوړنې رييس، ښاروال او اړونده چارواکو سره وکتل
نن (سه شنبه، ۲۱، سلواغې) د ولايتي سفرونو په بهیر کې، د شهيدانو او معلولينو په چارو سرپرست وزیر ښاغلي پوهنمل حمیدالله فاروقي، د لغمان محترم والي رحمت الله زیارمل په شمول، د ولايت د شهيدانو او معلولينو چارو د اسنادو څېړنو کميسيون له غړو، مستوفي، د ښارجوړنې رييس، ښاروال او اړونده چارواکو سره لیدنه وکړه.
په ياده ليدنه کې د لغمان مستوفي، د ښارجوړنې رييس، ښاروال، د سترې محکمې، لويې څارنوالۍ، عامې روغتيا، د احصايې او معلوماتو ادارې او ملي امنيت استازو، د لغمان د شهيدانو او معلولينو چارو آمر او د ولايت مقام باصلاحيته چارواکو ګډون کړی و.
ښاغلي فاروقي، د شهيدانو او معلولينو چارو د اسنادو څيړنې کمېسيون له غړو سره د ياد کمېسيون پر کار او د اسنادو د څيړنو پروسې د لا شفافيت په موخه د برېښنايي پېژندپاڼو د وېش پر چټکتيا خبرې وکړې.
د ښاغلي فاروقي په خبره، چې دوی ته د شهيدانو وارثینو او معلوليت لرونکو وګړو د ستونزو ته پر وخت رسیدنه لومړيتوب لري او د هغوی لپاره باید د ژوند له لومړنيو اړتياوو، تر روغتيايي او تحصيلي زمينو برابرولو پورې اسانتياوې برابرې شي.
همداراز ښاغلي فاروقي د شهيدانو وارثينو او معلوليت لرونکو وګړو لپاره د حقوقو او امتيازاتو ورکولو په برخه کې د اسانتياوو را منځته کولو او بانکي سازۍ په تړاو خپلې غوښتنې، لارښونې او وړاندېزونه، د لغمان له محترم مستوفي سره شريک کړل.
ښاغلي فاروقي د شهیدانو ورثې او معلولینو لپاره د استوګنځیو پر وېش او د اسایشګاوو جوړولو په هکله هم خبرې وکړې او په دې تړاو یې د لغمان له خلکو سره وروستي پرمختګونه او لاسته راوړنې شریکې کړې. په ورته وخت کې یې د معلولیت لرونکو وګړو لپاره د کاري عرفو د توزیع په پروسه کې د عدالت ټینګښت، برابرۍ په پام کې نیولو سره د لغمان ښاروال ته لازمې سپارښتنې وکړې.
نوموړي د شهيدانو وارثينو او معلوليت لرونکو وګړو ستونزو ته پر وخت رسېدنه باندې ټینګار وکړ او له اړونده چارواکو یې د لازمې همکارۍ غوښتنه وکړه.
د ناستې په پای کې د شهيدانو او معلولينو چارو د اسنادو څېړنو کميسيون غړو، مستوفي، د ښارجوړنې رييس، ښاروال او اړونده چارواکو له محترم وزير پوهنمل حمیدالله فاروقي او ور سره مل پلاوي څخه مننه وکړه، چې د ياد ولايت د شهيدانو وارثينو او معلوليت لرونکو وګړو غوښتنې، ستونزې، وړاندېزونه يې له نږدې واورېدل او په همدې موخه يې لغمان ولايت ته سفر را وکړ.
ښاغلي فاروقي د شهيدانو او معلوليت لرونکو وګړو د اسنادو پروسې پر روڼتيا د ټينګار تر څنګ، د وزارت له اړخه له ټولو ولایتي مسوولو چارواکو سره د هر ډول همکاريو ژمنه وکړه او له وزارت سره د ولايتي ادارو د همغږۍ او همکارۍ د لا زياتوالي سپارښتنه يې وکړه.
