د شهیدانو کورنیو او معلولیت لرونکو وګړو ته رسیدنه به د دواړو ادارو د مشترک کار لومړیتوب وي
د شهیدانو کورنیو او معلولیت لرونکو وګړو ته رسیدنه به د دواړو ادارو د مشترک کار لومړیتوب وي
د شهیدانو او معلولینو په چارو کې د دولت وزیر لعل الدین آریوبي د جمهور رییس ځانګړي استازي او د سولې په چارو کې د دولت وزیر عبدالسلام رحیمي سره وکتل او د شهیدانو کورنیو او معلولیت لرونکو وګړو ستونزو ته د رسېدنې او دوی ته د مناسبو امکاناتو او اسانتیاوو برابرولو په اړه یې خبرې وکړې.
ښاغلي آریوبي وویل د شهیدانو کورنۍ او معلولیت لرونکي وګړي د جګړې اصلي قربانیان دي، چې ګڼو ستونزو سره مخ او د ژوند له ډېرو اړینو اسانتیاوو بې برخې دي. مهمه ده، چې دې خلکو ته د سرپناه، کارموندنې، زده کړو، روغتیا، حج سهمیو، فزیکي لاسرسي او نورو برخو کې پاملرنه زیاته شي. ښاغلي آریوبي یادو چارو ته د رسېدو لپاره پر مشترک کار ټینګار وکړ زیاته یې کړه، چې د شهیدانو کورنیو او معلولیت لرونکو وګړو ته رسیدګي باید د کارونو لومړیتوب وي. آریوبي څرګنده کړه، چې د سولې مشورتي لویې جرګې د پرېکړه لیک په ۱۷ ماده کې هم په دې اړه یادونه او تاکيد شوی دی.
ښاغلي عبدالسلام رحیمي هم د جګړې د قربانيانو کورنیو ته د رسېدنې په برخه کې د شهیدانو او معلولینو په چارو کې د دولت وزارت د هڅو او کړنو مننه او ستاینه وکړه وویل: د دې لپاره چې د حکومت د هڅو اغېز ډېر شي، د جګړې قربانیانو ته د رسېدنې چارې د اړوندو بنسټونو تر منځ لا ډېر انسجام ته اړتیا لري. ښاغلي رحیمي هم په دې برخه کې د ګډ کار ژمنه وکړه زیاته یې کړه، چې د سولې مشورتي لویې جرګې د پرېکړه لیک سره سم به د شهیدانو کورنیو او معلولیت لرونکو وګړو ته رسیدګي وشي.
