ټولې اصلاحي برنامې او اجراات د معلولینو او د شهیدانو ورثې د ژوند د ښه والي لپاره ترسره کېږي
ولې اصلاحي برنامې او اجراات د معلولینو او د شهیدانو ورثې د ژوند د ښه والي لپاره ترسره کېږي
د افغانستان د معلولیت لرونکو وګړو ټولنیزې سرتاسري شورا مشرتابه او غړو د شهیدانو او معلولینو په چارو کې د دولت وزیر لعل الدین آریوبي سره وکتل او په یو شمېر مسایلو یې خبرې وکړې.
د افغانستان د معلولیت لرونکو وګړو ټولنیزې سرتاسري شورا رییس مسعود صافي مننه وکړه، چې د وزارت رهبرۍ سره په مخامخ ډول د ستونزو د شریکولو او حل لپاره ښه فرصت برابر شو. ښاغلي صافي وویل، چې د قانون او اصولو سر سم خپلې ستونزې، غوښتنې او وړاندیزونه شریکوي او د حل لپاره یې وزارت سره په مشترکه او همغږې توګه همکاري کوي. نوموړي زیاته کړه، چې د روانو اصلاحاتو ملاتړ کوي او دا دوی غوښتنه وه، چې روڼتیا رامنځته شي. ښاغلي صافي د معلولینو د سرتاسري شورا او وزارت تر منځ د یووالي او همغږۍ زیاتېدو سربېره د اسنادو بررسۍ په کمېټو کې د معلولینو مشورو اخیستو پر څرنګوالي هم تاکید وکړ. ښاغلي صافي د وزارت رهبرۍ ته د هر اړخېزې همکارۍ ډاډ څرګند کړ.
د یادې شورا ځینو غړو هم خبرې وکړې او خپل نظرونه یې د وزارت رهبرۍ سره شریک کړه. د دې تر څنګ یې خپل ځیني وړاندیزونه، چې د سولې په پروسه کې د معلولینو ګډون، کارموندنه، کابل ښاروالۍ سره د هوکړه لیک د تطبیق، حقوقو ورکړې، په پرېکړو کې د دوی شمولیت، دولتي ادارو کې د مشاورینو ټاکنه، زده کړې، تبعیض ختمونه، معلولینو ته د ځانګړي کلینک او اسایشګاوو جوړول، د اپارتمانونو او ځمکو وېش، د معلولیت اړوندو موسسو د فعالیتونو تعقیب، د معلولینو د ملي فدراسیون د کارونو نهایي کول او نور موارد پکې شامل وو، شریک کړه.
ښاغلي آریوبي د یادې شورا له ملاتړ او همکارۍ مننه وکړه او د ترسره شویو اجرااتو او روانو اصلاحاتو په اړه یې ورته هر اړخیز معلومات وړاندې کړه وویل: د سولې پروسه کې د معلولینو د ګډون، قوانینو تعدیل، تبعیض ختمونې، زونونو کې د اسایشګاوو جوړولو، کارموندنې، په دولتي ادارو کې د مشاورینو ګمارنې، حج سهمیو، ملي فدراسیون جوړولو او نورو یادو برخو کې پرمختګ شوی او نتیجه یې څرګنده ده. ښاغلي آریوبي زیاته کړه، چې معلولینو ته به پرېکړو او ځینو مواردو کې د دوی نظر اخیستو ته هم زمینه برابره کړي، تر څو ټولې چارې له نږدې وڅاري او په ځینو برخو کې خپلې رغنده طرحې هم وړاندې کړي.
