صبري اندړ د نظامي شهیدانو او معلولینو چارو د انسجام د مرستیالې په توګه رسماً معرفي شوه
صبري اندړ د نظامي شهیدانو او معلولینو چارو د انسجام د مرستیالې په توګه رسماً معرفي شوه
نن سه شنبه د (چنګاښ میاشتې ۳) د شهیدانو او معلولینو په چارو کې د دولت وزیر ښاغلي لعل الدین آریوبي، صبرۍ اندړ د نظامي شهیدانو او معلولینو چارو د انسجام د مرستیالې په توګه رسماً د دې وزارت مسولینو ته وروپېژندله.
د آغلې صبرۍ اندړ د پېژندنې په مراسمو کې د شهیدانو او معلولینو په چارو کې د جمهور رییس سلاکار عمراخان منیب، د وزارت مرستیالانو، رییسانو او مشاورینو هم ګډون درلود.
په پیل کې د وزارت د دفتر رییس سید حامد هاشمي د صبري اندړ د ګمارنې په اړه د جمهور رییس حکم ولوست، چې نوموړې ته پکې د بریاوو هیله شوې وه.
ښاغلي آریوبي د صبرۍ اندړ د وړتیاوو د ستاینې تر څنګ د نوموړې په ګمارنه خوښي وښوده او له جمهور رییس نه یې مننه وکړه، چې په دې برخه یې همکاري وکړه. ښاغلي آریوبي په دولتي بستونو کې د معلولینو ګمارنه د خپل ماموریت لومړیتوب وباله وویل، چې په دې اړه یې نور مهم پلانونه هم تر لاس لاندې دي، تر څو معلولین په هر اړخیزه توګه ټولنیز او سیاسي مشارکت ته ورسېږي. ښاغلي آریوبي د پخواني مرستیال بشیر احمد ولي هڅې هم وستایلې او یو صادقه شخص یې وګڼه.
ښاغلي عمراخان منیب هم د صبري اندړ د فعالیتونو، هڅو او وړتیاوو ستاینه وکړه او نوموړې یې د یادې دندې لپاره مناسبه وګڼله. د دې تر څنګ یې له جمهور رییس او د شهیدانو معلولینو په چارو کې د دولت وزیر ښاغلي آریوبي څخه هم مننه وکړه، چې څو ورځې وړاندې یې یو معلول د ننګرهار د شهیدانو او معلولینو چارو آمریت د سرپرست په توګه وګماره. نوموړي زیاته کړه، چې معلولیت لرونکي وګړي د بېلابېلو وړتیاوو خاوندان دي، د دوی ټولنیز، سیاسي، اقتصادي او فرهنګي ګډون ته باید زمینه برابره شي. له ښه مرغه چې ښاغلي آریوبي دې برخې ته ډېره پاملرنه کړې ده.
د ښځو په استازولۍ د وزارت د جنډر سلاکارې آغلې صفیې صدیقي د اندړ ګمارنه ښه اقدام وباله او هیله یې وښوده، چې دا لړۍ دومداره شي.
آغلې صبرۍ اندړ د جمهور رییس او د شهیدانو او معلولینو په چارو کې د دولت د وزیر له باور څخه مننه او ژمنه یې وکړه، چې خپلې چارې به په پوره ریښتینولۍ ترسره کوي، تر څو معلولینو ته د ویاړ سبب وګرځي او پرې شوی باور پر ځای کړي. نوموړې زیاته کړه، چې د خپلو مسولیتونو تر څنګ په نورو هغو برخو کې چې د معلولینو د ژوند د ښه والي لامل کېږي، هم همکارۍ ته چمتو ده.
