په کنړ ولایت کې د شهیدانو او معلولینو چارو ریاست کړنې او فعالیتونه په هر اړخیزه توګه وڅیړل شول
د شهیدانو او معلولینو چارو وزارت د څارنې او ارزونې رئیس محترم الحاج مولوي نورالحق حقاني په مشرۍ یو پلاوی چې د یاد ریاست د تطبیقي پلانونو څخه د څارنې او ارزونې آمر محترم ملا اهل الله او د دې ریاست دوه مسلکي غړي هر یو محترم محمد شفیق شیرزاد او محترم محمد فاروق ځلاند یې ملتیا کوي، په کنړ ولایت کې د شهیدانو او معلولینو چارو ریاست کړنو او فعالیتونو څخه هر اړخیزه څیړنه او ارزونه ترسره کړه.
الحاج مولوي نورالحق حقاني د یاد ریاست مسؤلینو او کارکوونکو ته خبرې وکړې او زیاته یې کړه: تاسو تر ټولو نیکمرغه خلک یاست چې د دې مظلوم قشر خدمت کوئ، د خپل مشر اطاعت وکړئ، په پوره اخلاص سره خپل سپارل شوي مسؤلیتونه تر سره کړئ تر څو یتیمانو، کونډو او معلولینو ته غوره خدمتونه وړاندې شي.
د یادونې وړ ده چې یاد پلاوی به د یتیمانو، کونډو او معلولینو د تثبیت په پروسه کې د شفافیت او د ځینو ستونزو د حل په موخه د یاد ولایت د نرنګ او څوکۍ ولسوالیو ته سفر وکړي.
په پام کې ده چې مؤظف پلاوی به د کنړ ولایت له والي سره د شهیدانو او معلولینو چارو ریاست د ستونزو د له منځه وړلو په موخه هم لیدنه وکړي.
