د کندهار ولايت د شهيدانو او معلولينو چارو رئيس د یونما دفتر له مسؤلینو سره وکتل
د کندهار ولايت د شهيدانو او معلولينو چارو رئيس محترم مولوي سید محمد طاهر آغا په خپل کاري دفتر کې د یونما دفتر له مسؤلینو سره وکتل، د دې کتنې پر مهال د یاد ولایت د بهرنېو چارو رئيس محترم عبدالشکور حقاني هم شتون درلود.
په پېل کې محترم مولوي سید محمد طاهر آغا په کندهار ولايت کې یې د ثبت شوېو یتیمانو، کونډو او معلولینو د آمارو او ارقامو په هکله معلومات وړاندې کړل او زياته یې کړه: په جنوب لویدیز زون کې د څو لسیزو جګړو او ناخوالو له امله زرګونه تنه یتیم، کونډې او معلول شوي او هغوی د ژوند په بېلابېلو برخو کې مرستو ته اړتيا لري.
نوموړي همداراز د یونما دفتر له مسؤلینو څخه وغوښتل چې یتیمانو، کونډو او معلولیت لرونکو وګړو سره دې په تعليمي، روغتیايي، حرفوي زده کړو او نورو برخو کې مرستې ترسره کړي تر څو هغوی اقتصادي ځان بساینې ته ورسېږي.
ورپسې د کندهار ولايت د بهرنېو چارو رئيس محترم مولوي عبدالشکور حقاني هم د شهیدانو ورثۀ ؤ او معلولینو لپاره د مرستو د چمتو کولو په هکله خبرې وکړې او زياته یې کړه: نړیوالې خیریه مؤسسې او بنسټونه دې د ملکي ادارو سره په همغږۍ دې اړمن قشر ته مرستې چمتو کړي په دې سره به چمتو شوې مرستې واقعي مستحقینو ته ورسېږي.
نوموړي همداراز وویل: ملګري ملتونه دې اسلامي ارزښتونو ته بشپړ درناوی وکړي او د اسلامي امارت په لاسته راوړنو او پرمختګونو دې سترګې نه پټوي.
په ورته وخت کې د یونما دفتر مسؤل هم د معلوليت لرونکو وګړو او د بې سرپرسته کورنېو سره یې د مرستو نه ترسره کولو لامل یې د کافي بوديجې نشتوالي یاد کړ، او ژمنه یې وکړه چې دې اړمن قشر ته د مرستو چمتو کولو په موخه به پوره هلې ځلې وکړي.
