د کمک موسسې د شهيدانو او معلولينو په چارو کې دولت وزارت مشرتابه هئيت ته د خپلو درې کلنو فعاليتونو راپور ورکړ
د کمک موسسې د شهيدانو او معلولينو په چارو کې دولت وزارت مشرتابه هئيت ته د خپلو درې کلنو فعاليتونو راپور ورکړ
نن د لړم په ۲۶مه، د کمک موسسې مسولينو د شهيدانو او معلولينو په چارو کې د دولت وزارت رهبري هئيت ته، د جنګ ځپلو او له جګړو د اغيزمنو کورنيو سره په مالي، فزيکي او رواني درملنې، پانګونې، کارموندنې، حرفوي او تخنيکي زده کړو، ظرفيت لوړونې، د ژوند اسانتياوو برابرولو او عامه پوهاوي برخو کې د خپلو فعاليتونو مرستو او لاسته راوړنو درې کلن راپور ورکړ.
په دې ناسته کې د شهيدانو او معلولينو په چارو کې د دولت وزارت د برنامو او همغږۍ مرستيالې صبرۍ اندړ، د کمک موسسې له چارواکو مننه وکړه، چې د خپلو درې کلنو فعاليتونو راپور، په افغانستان کې د جګړو ځپلو، شهيدانو او معلولينو په چارو کې يوازيني رسمي ادرس سره شریکوي.
آغلې اندړ زياته کړه، چې د کمک خيريه موسسې فعاليتونه د قدر وړ دي؛ اما دا فعاليتونه بايد د شهيدانو او معلولينو په چارو کې د دولت وزارت په مشرۍ او له دوی سره په لا همغږۍ ترسره شي؛ تر څو د مرستو په بهير کې پوره روڼوالی رامنځته شي او حق حقدار ته وسپارل شي.
د آغلې اندړ په خبره، چې د کمک موسسه دې له وزارت سره په ګډه يو منظم او منسجم ميکانيزم جوړ کړي، څو د جګړو ځپلو وګړو لاسنيوی په شفاف، سمه او غوره بڼه اجرا شي.
