د پکتیا ولایت د شهیدانو او معلولینو چارو ریاست لپاره نوی رئیس رسماً معرفي او دنده یې پیل کړه
د افغانستان اسلامي امارت د ریاست الوزراء عالي مقام د حکم پر اساس او د شهیدانو او معلولینو چارو وزارت د وړاندیز له مخې، محترم مولوي محمد رسول وطن مل د پکتیا ولایت د شهیدانو او معلولینو چارو ریاست د نوي رئیس په توګه کارکوونکو ته معرفي او دنده یې رسماً پیل کړه.
د معرفي دا غونډه چې د پکتیا ولایت د شهیدانو او معلولینو چارو په ریاست کې جوړه شوې وه، د شهیدانو او معلولینو چارو وزارت د مالي او اداري چارو عمومي رئیس محترم مولوي کلیم الله افغان، د پکتیا ولایت مرستیال والي محترم شیخ صلاح الدین ایوبي،
د وزارت د کارکوونکو چارو رئیس محترم مولوي محمد موسی صدیقي، د دعوت او ارشاد رئیس محترم مفتي عبدالاحد مسعود او د اړوند ریاست مرکزي او د ولسوالیو کارکوونکو حضور درلود.
د شهيدانو او معلولينو چارو وزارت پلاوي د پخواني رئیس محترم مولوي محمد نبي محمدي له صادقانه او مخلصانه خدماتو مننه وکړه او نوي رئیس ته یې د ښه خدمت کولو تر څنګ د پخواني رئیس د پاتې پلانونو د تطبیق سپارښتنه هم وکړه.
همداراز محترم مولوي محمد رسول وطن مل هم له خپله اړخه د چارو ښه پرمختګ او مراجعینو ته د اصولو او طرحو مطابق د ښو او پر وخت د خدماتو وړاندې کولو ډاډ ورکړ.
