د پارا المپیک لوبغاړو ته به د سیالیو ترسره کولو په موخه مناسب فرصتونه برابر شي
د پارا المپیک لوبغاړو ته به د سیالیو ترسره کولو په موخه مناسب فرصتونه برابر شي
د شهیدانو او معلولینو چارو سرپرست وزیر پوهنمل حمیدالله فاروقي د پارا المپیک کمیټې رئیس او غړو سره وکتل.
د پارا المپیک کمیټې رییس ښاغلي عبدالحسین حصاری د یادې کمیټې د برنامو په اړه معلومات وړاندې کړه وویل: یاده کمیټه دولسو ولایتونو کې ۲۱۳۰ معلولیت لرونکي ورزشکار غړي لري چې کورنیو او نړیوالو سیالیو کې لوبې ترسره کوي. ښاغلي حصاري په مرکزي جمنازیوم کې د لوبغاړو لپاره د ورزشي وسایلو کمښت، د بودجې محدودیت او د زرغونو ورزشي سیمو نشتون مهمې ننګونې وبللې، چې لوبغاړي یې ستونزو سره مخ کړي دي. ښاغلي حصاري د وزارت او پارا المپیک کمیټې د غړو تر منځ د مشورتي بورډ د جوړېدو غوښتنه وکړه.
د شهیدانو او معلولینو چارو وزارت سرپرست وزیر پوهنمل حمیدالله فاروقي د پارا المپیک کمېټې معلولیت لرونکو لوبغاړو د لاسته راوړنو ستاینه وکړه او معلولیت لرونکي لوبغاړي یې د لوړو ظرفیتونو خاوندان وګڼل. ښاغلي فاروقي وویل: د بودجې د کمښت په اړه به د مالیې وزارت سره خبری وکړي، د زرغونې سپورتي سیمې او نورو اسانتیاوو رامنځته کولو برخه کې به نړیوالو موسساتو سره همغږي وکړي ترڅو په دوامداره توګه د یادو لوبغاړو ملاتړ وشي. ښاغلي فاروقي لارښوونه وکړه چې د شهیدانو او معلولینو چارو ولایتي آمریتونه د پارا المپیک کمیټې له لوبغاړو سره بشپړه همکاري وکړي.
