د نیالګیو کښېنولو ملي ورځې په ویاړ نوي نیالګي کښېنول شوه
د نیالګیو کښېنولو ملي ورځې په ویاړ نوي نیالګي کښېنول شوه
نن شنبه د (کب میاشتې ۲۴ نېټه) د شهیدانو او معلولینو په چارو کې د دولت وزارت رهبرۍ د هېواد د ښېرازۍ په موخه د وزارت په انګړ کې د نویو نیالګیو کښېنولو اشر ترسره کړ.
د نیالګیو کښېنولو ملي کمپاین پر مهال د شهیدانو او معلولینو په چارو کې د دولت وزیر ښاغلي لعل الدین آریوبي د یوه نوي نیالګي په کېښنولو وویل، چې د کب شلمه د جلالتماب جمهور رییس د ځانګړي فرمان پر بنسټ د نیالګیو کښېنولو ملي ورځ نومول شوې او د کابل په ګډون په ټولو ولایتونو کې د نیالګیو کښېنولو اشر ترسره کېږي.
ښاغلي آریوبي زیاته کړه، چې د وزارت په انګړ کې د نیالګیو کښېنولو موخه یې ټولو هېوادوالو ته د هېواد د ښېرازۍ لپاره د نویو نیالګیو کښېنولو پیغام ورکول دي او هیله من دی، چې هر فرد د ملي مسولیت په توګه یو نیالګی د ځان او بل د هېواد لپاره کښېنوي او د هېواد په ښېرازۍ او د طبیعت په ښکلا کې برخه واخلي.
ښاغلي آریوبي وویل، چې د نیالګیو کښېنول د هوا د ښه والي تر څنګ په اقتصادي او فرهنګي برخه کې هم د پام وړ نقش لري او اړینه دا ده، چې نویو کښېنولو شویو نیالګیو څخه ټول په ښه توګه ساتنه او پالنه وکړو. ښاغلي آریوبي زیاته کړه، چې د وزارت اړوند ولایتي آمریتونو ته یې آمر کړی، چې په دې ملي کمپاین کې فعاله ونډه واخلي.
د وزارت د مالي او اداري چارو مرستیال ښاغلي دل آقا صوفي زاده د نیالګیو کښېنولو ملي ورځ د هېواد د ښېرازۍ لپاره ښه ګام وګڼه او په ټولو هېوادوالو یې غږ وکړ، چې دې ملي کمپاین کې شریک شي.
مولوي شمس الله حقاني د وزارت د رهبرۍ له لوري د نیالګیو کښېنولو کمپاین یو نوښت وباله او په دې اړه یې اسلامي او شرعي احکام بیان کړل.
