د غزني ولایت د شهیدانو او معلولینو چارو رئيس د ياد ولايت دوو ولسوالیو ته سفرونه ترسره کړل
د غزني ولايت د شهیدانو او معلولینو چارو رئيس محترم ملا عبدالحکیم دانش په مشرۍ یو پلاوي د ياد ولايت خوګياڼو او خواجه عمري ولسوالیو ته سفرونه ترسره کړل، هلته یې د مجردو شهیدانو کورنیو سره له نږدې ليدنې وکړې، د هغوی ستونزې او غوښتنې یې واورېدې او ورسره یې یو اندازه نغدي مرستې هم ترسره کړې.
نوموړي د شهیدانو کورنیو ته ډاډ ورکړ چې ستونزو او غوښتنو ته به يې پر وخت رسېدنه وشي.
هغه همداراز د سروې پروسې د ښه ترسره کيدو په موخه د اړوندو ولسواليو مدیرانو ته یې لازمې لارښوونې وکړې.
د شهیدانو او معلولینو چارو رئيس د اړوندو ولسوالیو له ولسوال صاحبانو سره د لیدنو پر مهال د یتیمانو، کونډو او معلولینو د ستونزو او اړتیاوو په اړه خبرې وکړې او ټینګار یې وکړ چې د خدمتونو د لا ښه وړاندې کولو لپاره دې د پخوا په څېر خپلې همکارۍ لا پیاوړي کړي.
