د شهیدانو او معلولینو چارو په وزارت کې پر (۳۵) تنو مستحقو کسانو باندې د زرنج نقلیه وسایط ووېشل شول
د شهیدانو او معلولینو چارو وزارت د معلولینو او یتیمانو د اقتصادي ځان بسیاینې په موخه، د یوې خیریه مؤسسې سره په همغږۍ، (۳۵) تنه مستحق یتیمان او معلولین د زرنج نقلیه وسایطو څخه برخمن کړل، دا وسایط به د هغوی لپاره د عاید د یوې دایمي سرچینې په توګه ګټور واقع شي، هغوی به وکولای شي د دې لارې خپل ورځيني لګښتونه او اړتیاوې پوره کړي.
یادې مرستې د شهیدانو او معلولینو چارو وزارت مرستیال محترم شیخ صاحب عبدالحکیم حقاني، د ټولنیزو خدمتونو د تنظیم رئیس محترم مولوي ثناء الله فرقاني، د څارنې او ارزونې رئیس محترم محمد صابر ځواک، د وزارت د پروژو له تطبیق څخه د څارنې او ارزونې آمر محترم ملا مطیع الله ابوالمختار، د نشراتو آمر محترم حافظ محمد یعقوب روښان او د مؤسسې د مسؤلینو په شتون کې پر مستحقو معلولینو او یتیمانو ووېشل شوې.
محترم شیخ صاحب عبدالحکیم حقاني د یادې خیریه مؤسسې له ترسره شويو مرستو مننه او قدرداني وکړه او هغه یې د یتیمانو او معلولینو د ملاتړ او اقتصادي ځان بسیاینې په برخه کې د ستاینی وړ او نیک اقدام وباله، د هغو کسانو څخه چې زرنج نقلیه وسایط یې ترلاسه کړي وو، هم وغوښتل چې له دې وسایطو څخه سمه ګټه پورته کړي، همداراز یې پر نورو خیریه بنسټونو هم غږ وکړ، څو د شهیدانو او معلولینو چارو وزارت سره په همغږۍ د شهیدانو ورثه وو او معلولیت لرونکو وګړو ته د هوساینې او ملاتړ په موخه ورته مرستې برابرېکړي.
