د شهیدانو او معلولینو چارو په وزارت کې د کارکوونکو د ظرفیت لوړونې په موخه روزنیز پروګرام پیل شو
د شهیدانو او معلولینو چارو وزارت د کارکوونکو د ظرفیت لوړونې په موخه روزنیز پروګرام پیل کړ، په یاد روزنیز پروګرام کې به د وزارت اړوند، ټولو کارکوونکو ته د قرآن عظیم الشان د ناظرې او تجوید برخه، د اداري او همدارنګه د مسلکي چارو په برخه کې روزنه ورکول کیږي، د دی پروګرام د پلي کیدو سره به د وزارت ټول کارکوونکي وکولې شي، په خپلو ورځنیو چارو کې خپلې ستونزې حل کړي.
د یاد روزنیز پروګرام په پیل کې د شهیدانو او معلولینو چارو وزارت د بشري سرچینو رئیس مولوي محمد موسی صدیقي د دغه ډول روزنیز پروګرامونو جوړول د کارکوونکو د مهارتونو د زده کړې او د ظرفیت په لوړوالي کې اړین وباله او کارکوونکي یې وهڅول تر څو په یاد روزنیز پروګرام کې په منظم ډول ګډون وکړي.
د یادولو وړ ده چې یاد روزنیز پروګرام به د قرآن عظیم الشان د تجوید او ناظرې په برخه کې د دریو میاشتو لپاره وي او د اداري اصولو او د مسلکي زده کړو په برخو کې به یوه اونۍ دوام ومومي.
د کارکوونکو د ظرفیت لوړونې روزنیز پروګرام په پای کې به د شهیدانو او معلولینو چارو وزارت لخوا ممتازو ګډونوالو ته ستاینلیکونه هم ورکړل شي.
