د شهیدانو او معلولینو چارو وزارت کې د دارالصدقه خیریه بنسټ له لورې پر یو سل او پنځه شپیتو تنو معلولیت لرونکو وګړو باندې ویلچرونه وویشل شول
په هغه پروګرام کې چې په همدې موخه د شهیدانو او معلولینو چارو وزارت کې جوړ شوی وو، په کې د شهیدانو او معلولینو چارو مرستیال ښاغلي شیخ صاحب عبدالحکیم حقاني، د معلولینو چارو رئیس ښاغلي مولوي عبدالنافع منتفع، د اجتماعي خدمتونو رئیس ښاغلي مولوي ثناء الله فرقاني او د دارالصدقه خیریه بنسټ مسؤلینو او د یاد بنسټ یو شمېر کارکوونکو شتون درلود.
په دې پروګرام کې د شهیدانو او معلولینو چارو مرستیال ښاغلي شیخ صاحب عبدالحکیم حقاني د دارالصدقه خیریه بنسټ له خوا په مستحقو معلولینو د ویلچرونو د ویش په اړه خبرې وکړې او د نوموړي خیریه بنسټ له مرستو یې مننه وکړه نوموړي همداراز زیاته کړه: معلولین او یتیمان حرفوي زده کړو او خوراکي مرستو ته اړتیا لري او د ياد خیریه بنسټ له مسؤلينو څخه یې وغوښتل تر څو له معلولينو او يتيمانو سره د حرفوي زده کړو، خوراکي توکو او جامو په برخو کې مرستې وکړي.
په دې پروګرام کې د دارالصدقه خيريه بنسټ مشر جمشيد ايوبي هم خبرې وکړې او د يادو مرستو د ويش په برخه کې يې د شهيدانو او معلولينو چارو وزارت له همکارۍ او همغږۍ څخه مننه وکړه او زياته يې کړه: دارالصدقه خیریه بنسټ هوډ لري چې د یادو مرستو سربیره، د شهیدانو او معلولینو چارو وزارت سره په همغږۍ یتیمانو او معلولینو ته د حرفوي زده کړو او د خوراکي توکو په برخو کې همکاري وکړي.
