د شهیدانو او معلولینو چارو وزارت مسلکي او تخنیکي مرستیال د ترکیې هېواد له یو شمیر علماؤ سره په خپل کاري دفتر کې وکتل
په هغه غونډه کې چې د شهیدانو او معلولینو چارو وزارت کې جوړه شوې وه په هغه کې د مسلکي او تخنیکي چارو مرستیال محترم الحاج ملا عبدالرزاق اخند، د مالي او اداري چارو عمومي رئیس محترم مولوي کلیم الله افغان، د اطلاعاتو او عامه اړیکو رئیس محترم مفتي فیصل خاموش، د داخلي تفتیش رئیس محترم مولوي احسان الله حقاني او د ترکیې هېواد یو شمیر علماؤ ګډون کړی وو.
د دې غونډې اصلي موخه د ترکیې هېواد د یو شمیر علماؤ له لوري د (طالبان زمونږ څه کیږي) تر عنوان لاندې د کتاب د لیکلو په اړه چې په هغه د اسلامي امارت د جهادي کارنامو، عدل او انصاف، شجاعت او د اسلامي نظام د تنفیذ په هکله د معلوماتو راټولول وو، د یاد وزارت د مسلکي او تخنیکي چارو مرستیال سره یې وکتل.
د شهیدانو او معلولینو چارو وزارت د مسلکي او تخنیکي چارو مرستیال محترم الحاج ملا عبدالرزاق اخند، د طالبانو د تېرې دورې حاکمیت پر څرنګوالي هراړخیزې خبرې وکړې او زیاته یې کړه: د اسلامي امارت د راتګ اصلي موخه په هېواد کې د رامنځ ته شویو ناخوالو، ظلم، بي عدالتۍ او فساد له منځه وړل او په هېواد کې د اسلامي نظام تنفیذ، د ځمکنۍ بشپړتیا ساتنه، د هېواد خپلواکي او د ظالم له لاسه د مظلوم خلاصول یاد کړل او د طالبانو د تېرې دورې د جهادي کارنامو په هکله یې هراړخیز معلومات وړاندې کړل.
په دې غونډه کې د شهیدانو اومعلولینو چارو وزارت مسلکي او تخنیکي چارو مرستیال د اسلامي امارت د بنسټ ایښودونکي مرحوم امیرالمؤمنین ملا محمد عمر مجاهد (رحمه الله) د جهاد، شجاعت، عدل او انصاف او د کارنامو په هکله هم هراړخیزې خبرې وکړې.
