د شهیدانو او معلولینو چارو وزارت رهبري شورا فوق العاده غونډه جوړه شوه
د شهیدانو او معلولینو چارو وزارت سرپرست او نوماند وزیر ښاغلي پوهنمل حمیدالله فاروقي تر مشرۍ لاندې د شهیدانو او معلولینو د اسنادو د تایید لپاره د تدقیق او څیړنې کمیټوغړو تر منځ د شورا فوق العاده ګډه غونډه (د معلولینو، شهیدانو او ورک شویو کسانو د تطبیقي اسنادو کړنلاره) د منظورۍ په موخه جوړه شوه.
پوهنمل حمیدالله فاروقي، د شهیدانو او معلولینو چارو سرپرست او نوماند وزیر، د افغان ځواکونو د دښمنانو پروړاندې د جګړې په ډګر کې ستاینه وکړه، د شهیدانو وارثینو او معلولیت لرونکو وګړو په ځانګړۍ توګه د امنیتي ځواکونو د شهیدانو ورثو او معلولینو ته د غوره خدمتونو وړاندې کولو لپاره یې د وزارت پر ژمنتیا ټینګار وکړ.
ښاغلي فاروقي ددې غونډې جوړول چې د شهیدانو ورثو معلولینو او ورک شویو کسانو د څیړل شوی اسنادو د تطبیقي کړنلارې د منظورۍ په موخه جوړه شوې وه، اړینه او تاریخي وګڼله او زیاته یې کړه چې د دې کړنلارې په عملي کیدو به روڼتیا، د قانون حاکمیت، ښه حکومتولۍ، حساب ورکول او عدالت رامنځ ته شي.
د یادې کړنلارې په طرح باندې څه موده وړاندې د شهیدانو او معلولینو د اسنادو د تدقیق او څیړنې کمیټو او د شهیدانو او معلولینو چارو وزارت په رهبرۍ کار پیل شوی وو، وروسته له ډیرو بحثونو د سترې محکمې د غوره نظریاتو څخه په ګټې اخیستنې او د رهبرۍ غړو او شهیدانو او معولینو چاور د وزارت سرپرست او نوماند وزیر په توافق منظوره شوه.
د دې کړنلارې په پلې کیدو د معلولیت د تثبیت ډیری سندونه، په دې اداره کې د شته سوابقو شرایط او د معلولیت درجې ټاکلو لپاره د روغتیا کمیسیون ته د معلولیت لرونکو وګړو د راجع کولو ستونزې به حل شي. هغه کسان چې په دې اداره کې هیڅ ډول اسناد نه لري، له دې امر څخه مستثنا دي.
