د شهیدانو او معلولینو چارو وزارت د ډېټابېس او معلوماتو ریاست یو پلاوي په کندهار ولایت کې د یاد وزارت اړوند ریاست د نوي الکټرونیکي سیسټم څخه څارنه او ارزونه ترسره کړه
د شهیدانو او معلولینو چارو وزارت د ډېټابېس او معلوماتو رئیس محترم الله محمد دوست په مشرۍ یو پلاوي کندهار ولایت ته د سفر په ترڅ کې د یاد وزارت اړوند ریاست کې د یتیمانو، کونډو او معلولینو د ثبت او بایومټریک په موخه د ایجاد شوي نوي الکټرونیکي سیسټم څخه څارنه او ارزونه ترسره کړه او په ورته وخت کې یې د یاد ریاست کارکوونکو ته لازمې لارښوونې او سپارښتنې وکړې.
په دې ارزونه کې د سیسټم چارو د پړاوونو کتنه، د قوانينو او طرزالعملونو په رڼا کې د سیسټم پلي کېدل، د مرکز په څېر په ولايتونو کې د اسنادو د پروسو ورته والی، د ثبت او بایومټریک په پروسه کې د روڼتیا په اړه ډاډ تر لاسه کول او د شته ستونزو له منځه وړل شامل وو.
په ورته وخت کې یاد پلاوي د کندهار ولايت د احصایې او معلوماتو له رئیس سره وکتل او یتیمانو، کونډو او معلولینو ته یې د بریښنایي پیژندپاڼو د ویش په برخه کې د لازیاتو آسانتیاوو د رامنځته کولو غوښتنه وکړه.
په دې کتنه کې د یاد ریاست مسؤلینو ژمنه وکړه چې د یتیمانو، کونډو او معلولینو لپاره د ځانګړې څانګې د پرانېستلو په موخه به، یاده موضوع د احصایې او معلوماتو ملي ادارې له رهبري سره شریکه کړي.
