د شهیدانو او معلولینو چارو وزارت د مالي او اداري چارو عمومي رئیس په مشرۍ باصلاحیته پلاوي په پروان ولایت کې د یاد وزارت د اړوند ریاست کړنې او فعالیتونه په هر اړخیز ډول وڅېړل.
د شهیدانو او معلولینو چارو وزارت د مالي او اداري چارو عمومي رئیس ښاغلي مولوي کلیم الله افغان په مشرۍ یو پلاوی چې پروان ولایت ته په سفر دې، د نوموړي ولایت د شهیدانو او معلولینو چارو ریاست فعالیتونه او کړنۍ په هر اړخیزه توګه وڅیړلې.
د شهیدانو او معلولینو چارو وزارت د مالي او اداري چارو عمومي رئیس ښاغلي مولوي کلیم الله افغان د نوموړي ریاست د کاري بهیر د څیړلو پر مهال چې د یاد وزارت د بودیجې په اړه څرګندونې کولې، ویې ویل: د شهیدانو او معلولینو چارو وزارت ته ځانګړې شوې بودیجه په ټولیزه توګه د هېواد د داخلي عوایدو څخه تمویل کیږي.
نوموړي همداراز د پروان ولایت د شهیدانو او معلولینو چارو ریاست مسؤلینو او کارکوونکو ته لارښوونه وکړه تر څو د یاد وزارت د کړنلارې سره سم، معلولیت لرونکي وګړي او یتیمان په پوره دقت سره ثبت او د تثبیت شویو کسانو حقوق او امتیازات په پر وخت او شفاف ډول ورکړي.
په ورته وخت کې د شهیدانو او معلولینو چارو وزارت د داخلي تفتیش رئیس ښاغلي مولوي احسان الله حقاني د یتیمانو او معلولینو دتثبیت په پروسه کې د رونټیا د رامنځته کولو په هکله خبرې وکړې او ویې ویل: باید یتیمانو او معلولیت لرونکو وګړو ته خدمتونه د وزارت د طرحې او کړنلارې سره سم وړاندې کړل شي، تر څو یاد کسان وکولې شي پر وخت او شفاف ډول خپل حقوق او امتیازات ترلاسه کړي.
د شهیدانو او معلولینو چارو وزارت د مالي او اداري چارو عمومي رئیس سره راغلي پلاوي په دغه ریاست کې د یو شمېر یتیمانو او معلولینو اسناد و څیړل او د تثبیت په پروسه کې د شفافیت د شتون د ډاډ ترلاسه کولو په موخه له یو شمېر یتیمانو او معلولیت لرونکو وګړو سره له نږدې وکتل او د هغوې څخه یې د خدمتونو د وړاندې کولو د څرنګوالي په هکله پوښتنې وکړې.
د یادولو وړ ده چې د شهیدانو او معلولینو چارو وزارت د باصلاحیته پلاوي په ترکیب کې د شهیدانو او معلولینو چارو وزارت د داخلي تفتیش رئیس ښاغلي مولوي احسان الله حقاني د معلولینو د تثبیت آمر حافظ عبدالکریم او همدارنګه د څارنې او ارزونې ریاست غړی شامل دې چې مشري یې د شهیدانو او معلولینو چارو وزارت د مالي او اداري چارو عمومي رئیس ښاغلی مولوي کلیم الله افغان کوي.
یاد پلاوي تیره ورځ د پنجشیر ولایت د شهیدانو او معلولینو چارو ریاست د فعالیتونو او کړنو څخه په هر اړخیز ډول څیړنه وکړه او په پام کې ده یاد پلاوی به په کاپیسا ولایت کې د وزارت اړوند ریاست کاري بهیر هم وڅیړي.
