د شهیدانو او معلولینو په چارو کې د دولت وزارت اداري غونډه وشوه
د شهیدانو او معلولینو په چارو کې د دولت وزارت اداري غونډه وشوه
نن چهار شنبه (د سلواغې میاشتې ۹ نېټه) د شهیدانو او معلولینو په چارو کې د دولت وزارت اداري مجلس د وزارت د وزیر ښاغلي لعل الدین آریوبي په رهبرۍ ترسره او په یو لړ مهمو موضوعاتو خبرې وشوې.
ښاغلي آریوبي ۱۳۹۸ مالي کال د شهیدانو او معلولینو په چارو کې د دولت وزارت لپاره حساس وګڼه وویل، چې د یوې نوې رامنځته شوې ادارې په توګه حالت اظطراري او غیر نورمال و، ځکه د چارو د تنظیم، اصلاحاتو، سیستم جوړونې، فساد سره د مبارزې، ګواښونو او ولایتي آمریتونو ستونزو ته د رسیدګۍ سره هممهاله د شهیدانو وارثینو او معلولیت لرونکو وګړو ته د حقوقو ورکړه او نور خدمتونه وړاندې کول اسانه چاره نه وه.
ښاغلي آریوبي ځینو ولایتونو ته د اسنادو د څېړلو په موخه د مرکز پلاوي سفرونه اغېزناک وبلل زیاته یې کړه، چې اوس هم په ځینو ولایتونو کې د فساد موارد او ناوړه ګټې اخیستنې شته دي، چې باید له منځه یوړل شي.
ښاغلي آریوبي په تېر مالي کې د بودیجې د کمښت یادونه هم وکړه، وویل چې سږ کال به شرایطو نابرابر کسان د حقوقو مستحق ونه ګڼل شي او مسحقو خلکو ته به د حقوقو د ورکړې په برخه کې لومړیتوب ورکړي. ښاغلي آریوبي زیاته کړه، چې د اسنادو څېړل او په شرایطو د نابرابرو کسانو غیر مستحق ګڼل به د حقوقو د ورکړې او بودیجې د کمښت ستونزې تر ډیره راکمې کړي.
ښاغلي آریوبي د بودیجې په اړه وویل، چې په سند کې شامله او د پارلمان له لوري تایید شوې ده او وزارت د خپلواکه کېدو موضوع به د پارلمان له رخصتۍ وروسته عمومي غونډې ته وړاندې او له مثبتې پایلې وروسته به د شهیدانو او معلولینو چارو وزارت په نامه خپلو فعالیتونو ته دوام ورکړي.
د تخنیکې چارو مرستیالې جمیلې نورستانۍ په مرکز کې د برېښنایي سیستم د تطبیق، د ورثې د تاییدۍ فورمې چاپ او وېشلو، د واحدې دریڅې له لارې د خدمتونو وړاندې کولو او په ټولو ولایتونو کې د بایومټرېک سیستم د پېلېدو په اړه هر اړخیزې خبرې وکړې.
ورپسې د مالي او حسابي چارو سرپرستې رییسې ډاګټر صفیې انوري په ۱۳۹۹ مالي کال کې د شهیدانو وارثینو او معلولیت لرونکو وګړو ته د حقوقو د ورکړې د څرنګوالي په اړه جوړ شوی مېکانېزم د پرزټېشن په بڼه وړاندې کړ او ګډونوالو پرې خبرې وکړې.
د یاد مېکانېزم موخه د شهیدانو د وارثینو او معلولینو د حقوقو بودیجې د پر وخت او سمې لګونې، فساد مخنیوی، روڼتیا رامنځته کول، چټکیتا او په شریطو د نابرابرو کسانو پېژندل دي.
د پلان او پالیسۍ رییس ذبیح الله اسحاقزي د انکشافي برخې پروپوزل او د ۱۳۹۹ مالي کال د پلان په اړه خبرې وکړې وویل، چې د انکشافي برخې پروپوزل جوړ شوی او د نظر اخسیتې او تایید لپاره به مالیې وزارت سره شریک شی.
د مقام د دفتر رییس په مرکز کابل کې ولایتي آمرینو ته د پوهاوي او همغږۍ په موخه د ورکشاپ جوړولو په اړه خبرې وکړې وویل، چې یوه کمېټه به جوړه او ټولې چارې به سمبال کړي.
د اداري چارو رییس عبدالله ثابت د امنیتي تدابیرو پیاوړتیا او مراجعینو ته د اسانتیاوو رامنځته کولو په اړه خبرې وکړې.
د ګډونوالو له نظرونو وروسته، غونډه د ښاغلي وزیر له ارزونې سره پای ته ورسېده.
