د شهیدانو او معلولینو چارو وزیر محترم الحاج ملا عبدالمجید آخند هرات ولایت ته سفر وکړ
د شهیدانو او معلولینو چارو وزیر محترم الحاج ملا عبدالمجید آخند نن هرات ولایت ته ورسید، د دعوت او ارشاد رئیس محترم مفتي عبدالاحد مسعود، د مالي او حسابي چارو رئيس محترم مولوي محمد امین دروېش، د ټولنیزو خدمتونو د تنظیم ریاست آمر محترم ملا ابراهیم شاه خلیل او د وزارت مقام سکرتر محترم حافظ نورمحمد په دې سفر کې د محترم وزیر صاحب ملتیا کوي.
د شهیدانو او معلولینو چارو محترم وزیر د هرات ولایت د شهیدانو او معلولینو چارو په ریاست کې د والي مرستیال محترم ملا نقیب الله حاجي ايوب په حضور کې د مجردو شهیدانو کورنیو سره لیدنه وکړه، د هغوی احوال یې له نږدې واخیست او ورسره یې یو اندازه نغدي مرسته هم ترسره کړه.
همداراز د دعوت او ارشاد رئیس محترم مفتي عبدالاحد مسعود د قرآن عظیمالشان د مبارکو آیاتونو او د رسول الله صلیاللهعلیهوسلم د سپېڅلو احادیثو په رڼا کې د شهادت د عظیم مقام او فضیلت په اړه هر اړخیزه وینا وکړه. نوموړي څرګنده کړه چې د شهیدانو کورنۍ او معلولین د اسلامي امارت له ځانګړې پاملرنې او ژوندي تعلق څخه برخمن دي او دا اړیکې به تلپاتې وي.
هغه زیاته کړه، د همدې موخې لپاره د شهیدانو او معلولینو چارو محترم وزیر یاد ولایت ته سفر کړی، څو د شهیدانو او معلولینو کورنیو سره له نږدې وګوري، د هغوی ستونزې او احوال واخلي او هغه ځانګړې تحفه چې د عالیقدر امیرالمؤمنین حفظهالله تعالی له لوري د مجردو شهیدانو کورنیو ته ځانګړې شوې ده، مستحقو کورنیو ته وسپاري.
محترم مفتي عبدالاحد مسعود همداراز وویل، اسلامي امارت د الله جلجلاله ستر نعمت او احسان دی چې افغان ولس ته یې ور په برخه کړی او د دې اسلامي نظام لپاره یې یو مهربان، خواخوږی او مشفق رهبر ټاکلی، چې وخت په وخت د خلکو، په ځانګړي ډول د شهیدانو کورنیو او معلولینو پوښتنه کوي او د هغوی د ستونزو او حالاتو څخه له نږدې ځان خبروي.
همداراز د هرات ولایت د شهیدانو او معلولینو چارو رئیس محترم مولوي برهانالدین حلیم، د محترم وزیر صاحب تود هرکلی وکړ، د سپېڅلو شهیدانو سترې قربانۍ یې وستایلې او د هغوی درنو کورنیو ته یې د درناوي مراتب کړل.
