د شهیدانو او معلولینو چارو وزارت د څارنې او ارزونې با صلاحیته پلاوي په کنړ ولایت کې د یاد وزارت اړوند ریاست د کړنو او فعالیتونو هر اړخیزه څیړنه او ارزونه وکړه.
د ارزونې او پلټنې د پلاوي په ترکیب کې چې مفتي عبدالاحد مسعود دعوت او ارشاد رئیس، کریم الله فاروقي د بشري سرچینو ریاست د سوانحو آمر، قاري سیداسحق سعید د تطبیقي پلانونو د څارنې او ارزونې آمر شامل دي، او مشري یې د شهیدانو او معلولینو چارو وزارت د څارنې او ارزونې رئیس ښاغلی مولوي نورالحق حقاني کوي.
نوموړي پلاوي د یاد ولایت د شهیدانو او معلولینو چارو ریاست پر وړاندې د پرتو ستونزو او ننګونو د حل په موخه د کنړ ولایت له والي ښاغلي مولوي احمد طه قادري سره وکتل.
په یاده کتنه کې د کنړ ولایت د شهیدانو او معلولینو چارو ریاست پر وړاندې د پرتو ستونزو او ننګونو په هکله هر اړخیز بحث وشوو، په دې کتنه کې د کنړ ولایت په دفترونو کې د اووه سلنه تحصیل یافته معلولیت لرونکو وګړو د ګمارنې په هکله هم خبرې وشوې همدارنګه د خیریه بنسټونو لخوا د معلولینو او یتیمانو کورنېو سره د مرستو نه ویشل او په ولسوالیو کې د اړوند ریاست د مدیرانو لپاره د دفترونو نشتوالي ستونزې له والي سره شریکې کړل شوې.
په یاده غونډه کې د کڼړ والي ښاغلي مولوي احمد طه قادري د یادو ستونزو په له منځه وړلو کې د پوره همکارۍ ډاډ ورکړ.
په پای کې د شهیدانو او معلولینو چارو وزارت د څارنې او ارزونې ریاست غړي ښاغلي محمد فاروق ځلاند د نوموړي ریاست کارکوونکو ته د مدیریت اصولو د زده کړې په موخه یو ورځنۍ ورکشاپ هم وړاندي کړ. چې په یاد ورکشاپ کې کارکوونکو ته د ادارې اصولو په برخه کې لازمې لارښوونې وشوې.
په پام کې ده چې د څارنې او ارزونې ځانګړی پلاوې به د لغمان ولایت د شهیدانو او معلولینو چارو ریاست له کړنو او فعالیتونو څخه هم ارزونه وکړي.
