شهیدانو او معلولینو چارو په وزارت کې د دوو خالي بستونو لپاره ازموینه واخیستل شوه
د شهیدانو او معلولینو چارو وزارت د کارکوونکو چارو ریاست د دوو خالي بستونو د ډکولو په موخه، چې یو یې د مالي او حسابي چارو په ریاست کې بالمقطع او بل یې د بهرنیو اړیکو، پلان او تقنین چارو ریاست کې رسمي بست وو، د شفاف او عادلانه رقابت له لارې ازموینه واخیستله، د دې ازموینې موخه د وړتیا او مسلکي مهارت پر بنسټ د مناسبو کسانو ګمارل وو، چې په کې څوارلس (۱۴) تنو په شرایطو برابر کسانو ګډون کړی وو.
یاده ازموینه د کارکوونکو چارو ریاست د استخدام آمر محترم مولوي عبدالصمد حماد، د څارنې او ارزونې ریاست د راپورونو د تحلیل او توحید آمر محترم مولانا نورالدین صاحبزاده، د سوانحو او ارزونې آمر محترم کریم الله فاروقي، د ادارې پراختیا آمر محترم عزیز احمد احمدي، او د دعوت او ارشاد ریاست د استازي محترم قاري فضل الحق په حضور کې ترسره شوه.
د ازموینې بهیر په پوره دقت او شفافیت سره ترسره شو، ترڅو هغه کسان چې مسلکي وړتیاوې لري، په یادو بستونو کې وګمارل شي.
