د شهیدانو او معلولینو چارو وزارت د رهبرۍ غونډه وشوه
د شهیدانو او معلولینو چارو وزارت د رهبرۍ غونډه وشوه
دوشنبه د مرغومې په ۱۰مه، د شهیدانو او معلولینو چارو سرپرست وزیر پوهنمل حمید الله فاروقي په مشرۍ د وزارت د رهبري هييت غونډه ترسره شوه، چې مرستیالانو، رییسانو، مشاورینو او د وزارت نورو چارواکو پکې ګډون درلود.
په پیل کې ښاغلي فاروقي د کرونا ويروس د درېيمې څپې خپرېدو پر وړاندې وقايوي تدابير اړين وبلل او د مراجعينو په ګډون يې د وزارت ټولو کارکوونکو ته د عامې روغتيا وزارت د لارښوونو سره سم د زياتې پاملرنې سپارښتنې وکړې.
ښاغلي فاروقي د وزارت د چارو په اړه څرګنده کړه، چې ځینو برخو کې ستونزې موجودې دي؛ مهمه ده، چې د یوه منظم پلان پر بنسټ تشخیص او د له منځه وړلو لپاره یې جدي ګامونه پورته شي.
نوموړي زیاته کړه، چې د شهیدانو ورثې او معلولینو ته د خدمتونو وړاندې کولو بهیرونه باید ورځ تر بلې رڼه، معیاري او چټک شي، څو د شهيدانو ورثې او معلوليت لرونکو وګړو لپاره ځواب ويوونکې اداره په ميراث پرېږدو.
ښاغلي فاروقي د همغږۍ پیاوړتیا، عدالت، روڼتیا، برېښنايي سیستم تطیبق، فساد سره مبارزه، د چارو تنظيم، خپل دیني او وظیفوي مسولیتونه وګڼل وويل: چې ټولې چارې بايد د ورکړل شویو صلاحیتونو او قانون پر بنسټ ترسره شي او هیچاته به اجازه ور نه کړي، چې فساد او نورو ناقانونه کړنو ته لاره هواره کړي.
د دې تر څنګ یې ټولو مسولینو ته لارښوونه وکړه، چې په یاد ډول خپل مسولیتونه په صادقانه ډول ترسره کړي، تر څو د شهیدانو کورنۍ او معلولین پر خپل وخت له حقوقو او امتیازاتو برخمن شي.
د یادو موضوعاتو سربېره يې په ولایتونو کې د برېښنایي سیستم د تطیبق، بانکي سازۍ او د همغږۍ پر زياتوالي ټينګار وکړ.
