د شهیدانو او معلولینو چارو وزارت د تدارکاتو آمر معرفي او په کار یې پیل وکړ
د معرفي په دې مراسمو کې د شهیدانو او معلولینو چارو وزارت د مالي او اداري چارو عمومي رئیس ښاغلي مولوي کلیم الله افغان، د بشري سرچینو رئيس ښاغلي مولوي محمد موسی صدیقي، د نوموړي وزارت د دعوت او ارشاد رئیس ښاغلي مفتي عبدالاحد مسعود، د اداري او خدماتو رئيس ښاغلي ملا عبدالرحمن فهیم او همدارنګه د یاد وزارت ځینو کارکوونکو هم ګډون کړی وو.
ښاغلی قاري عبدالباسط د بشري سرچینو ریاست په وړاندیز او د شهیدانو او معلولینو چارو وزارت د مقام د لزوم دید پر اساس د تدارکاتو د نوي آمر په توګه د دغه آمریت کارکوونکو ته ور وپېژندل شو.
په دې مراسمو کې د شهیدانو او معلولینو چارو وزارت د مالي او اداري چارو عمومي رئیس ښاغلي مولوي کلیم الله افغان د باکیفیته او دوامداره خدمتونو د وړاندې کولو په برخه کې د دغه وزارت د تدارکاتو آمریت د کارکوونکو له صادقانه هلو ځلو څخه مننه وکړه او زیاته یې کړه: د شهیدانو او معلولینو چارو وزارت یو له هغو مهمو او کلیدي وزارتونو څخه دی چې د شهیدانو وارثینو او معلولینو ته د خدمتونو د وړاندې کولو په برخه کې مهمې دندې لري چې له نېکه مرغه د مسؤلینو او کارکوونکو د هڅو په پایله کې دا وزارت توانیدلی چې مراجعینو ته پر وخت او شفاف ډول خدمتونه وړاندې کړي.
په یادو مراسمو کې د شهیدانو او معلولینو چارو وزارت د بشري سرچینو رئیس ښاغلي مولوي محمد موسی صدیقي د تدارکاتو آمریت د یاد وزارت له مهمو او اساسي برخو څخه وباله او زیاته یې کړه؛ د شهیدانو او معلولینو چارو وزارت رهبري تل هڅه کړې، چې د ټولنې بېوزله او اړمن قشر (یتیمانو، کونډو او معلولینو) ته غوره خدمتونه وړاندې کړي.
نوموړي همداراز ښاغلي قاري عبدالباسط ته د شهیدانو او معلولینو چارو وزارت د تدارکاتو د آمر په توګه د معرفي کیدو مبارکي وویله او نوموړي ته یې د چارو په ترسره کولو کې د بریالیتوب هیله څرګنده کړه.
د دې مراسمو په پای کې د نوموړي وزارت د دعوت او ارشاد رئیس ښاغلي مفتي عبدالاحد مسعود هم د اسلامي نظام د پیاوړتیا او خدمتونو وړاندې کولو په برخه کې د مسلمانانو د مسؤلیتونو په هکله خبرې وکړې. نوموړي د تدارکاتو له نوي آمر څخه وغوښتل تر څو خپلې ورسپارل شوې دندې په پوره اخلاص او ایماندارۍ سرته ورسوي.
