د شهیدانو او معلولینو چارو وزارت د دعوت او ارشاد رئیس کندز ولايت ته سفر وکړ
د شهیدانو او معلولینو چارو وزارت د دعوت او ارشاد رئیس محترم مفتي عبدالاحد مسعود په مشرۍ یو پلاوي چې د مالي او حسابي چارو رئیس محترم مولوي محمد امین دروېش او د یاد ریاست کارکوونکي محترم مولوي سخي جان یې ملتیا کوله، د کندز ولايت د شهیدانو او معلولینو چارو رياست ته یې سفر وکړ او هلته یې د دعوت او ارشاد اړوند له چارو څخه ارزونه ترسره کړه.
محترم مفتي عبدالاحد مسعود په کندز ولایت کې د شهیدانو او معلولینو چارو ریاست له کارکوونکو سره په لیدنه کې د یتیمانو د مال او حقوقو د خوندي کولو او له ضایع کېدو څخه یې د مخنیوي پر اهمیت ټینګار وکړ او له ټولو کارکوونکو یې وغوښتل چې دندو ته پر وخت حاضر شي، له هر ډول غفلت او سهلانګارۍ څخه ځانونه وساتي او د بیتالمال په کارولو کې، له مېز او څوکیو نیولې تر بریښنا او د نورو منابعو په کارولو کې بشپړ احتیاط وکړي، ځکه چې ټول د الله تعالی جل جلاله په لوی امتحان کې واقع یو.
همداراز محترم مولوي محمد امین درویش د مشرانو د اوامرو د اطاعت په اړه هم ټینګار وکړ او له کارکوونکو یې وغوښتل چې د دعوت او ارشاد تعلیمي نصاب په بشپړ ډول عملي کړي او خپل سپارل شوي مسؤلیتونه په پوره همکارۍ او همغږۍ ترسره کړي.
د یادونې وړ ده چې د کندز ولايت د شهیدانو او معلولینو چارو په رياست کې د دعوت او ارشاد له مسؤل سره یو اندازه نغدي مرسته هم ترسره شوه.
