د شهیدانو او معلولینو چارو وزارت او د ژمنو ځوانانو او هوسا ټولنې مؤسسې تر منځ د هوکړه لیک لاسلیک
د شهیدانو او معلولینو چارو وزارت د کونډو او معلولیت لرونکو مېرمنو د اقتصادي ځان بسیاینې په موخه د ژمنو ځوانانو او هوسا ټولنې مؤسسې سره د همکارۍ هوکړه لیک لاسلیک کړ، چې له مخې به یې، د کابل ښار په دیارلسمه ناحیه کې د (۵۰) تنو کونډو او معلولیت لرونکو مېرمنو لپاره د کورنۍ نانوایي د جوړولو په موخه، اړین وسایل واخیستل شي او د هغوی په واک کې به ورکړل شي.
یاد هوکړه لیک د شهیدانو او معلولینو چارو وزارت د بهرنيو اړیکو او پلان رئيس محترم ملا صدوخان حق شناس او د ژمنو ځوانانو او هوسا ټولنې مؤسسې استازي محترم الطاف الحق رستم زاده تر منځ لاسلیک شو، چې د دې وزارت د ټولنیزو خدمتونو د تنظیم ریاست سره په همغږۍ به پلي شي.
همداراز یادو مېرمنو ته به د کورنۍ نانوایي د وسایلو تر وېش وروسته، د دوو میاشتو په موده کې به د ډوډۍ پخولو عملي زده کړې هم ورکړل شي، ترڅو مېرمنې وکولای شي د نانوایۍ له وسایلو څخه مؤثره استفاده وکړي او د خپلې کورنۍ لپاره عاید پیدا او پر ځان بسیا شي.
د یادونې وړ ده د دې پروژې ټولیز لګښت (۴۵) زره ډالره کېږي او د نه (۹) میاشتو په موده کې به تطبیق شي.
