اطلاعاتو ته لاسرسی د روڼتیا رامنځته کولو بنسټیز اصل دی
اطلاعاتو ته لاسرسی د روڼتیا رامنځته کولو بنسټیز اصل دی
د شهیدانو او معلولیو په چارو کې د دولت وزیر لعل الدین آریوبي اطلاعاتو ته د لاسرسي کمېسیون رییس عین الدین بهادري او غړو سره وکتل.
ښاغلي آریوبي اطلاعاتو ته د لاسرسي برخه کې د یاد کمېسیون د هڅو د ستاینې ترڅنګ وویل، چې د شهیدانو او معلولینو په چارو کې د دولت وزارت رسنیو، عامو خلکو او د اطلاعاتو نورو غوښتونکو ادرسونو ته د اطلاع رسونې او اطلاعاتو ورکړې ته بشپړ تعهد لري او په دې برخه کې له ټولو ممکنو لارو چارو کار اخلي.
ښاغلي آریوبي څرګنده کړه، چې د وزارت د اطلاع رسونې برخه فعاله ده او له مختلفو لارو خلکو سره په دومداره توګه اطلاعات شریکوي. زیاته یې کړه: مهمه ده، چې اطلاع رسونه او د معلوماتو شریکول اطلاعاتو ته د لاسرسي قانون پر بنسټ ترسره شي، تر څو ټولو هغو مواردو ته پاملرنه وشي، چې په قانون کې یې یادونه شوې ده. ښاغلي آریوبي په معیاري او اصولي ډول د اطلاعاتو شریکول د روڼتیا د ټینکښت او فساد سره د مبارزې مهم اصل وګڼه او د یاد کمیسیون د تخنیکي مرستې او همکارۍ غوښتنه یې وکړه.
اطلاعاتو ته د لاسرسي کمېسیون رییس ښاغلي عین الدین بهادري او غړو اطلاعاتو ته د لاسرسي په اړه د وزارت د مشرتابه ژمنتیا او هلې ځلې د قدر وړ وګڼلې ژمنه یې وکړه، چې د وزارت د اطلاع رسونې برخې له ارزونې وروسته به د اړتیا ور برخو کې هر اړخیزه تخنیکي مرسته او همکاري وکړي.
دواړو لوریو د اطلاعاتو د شریکولو پر اصل، لا ډېرې همغږۍ او همکارۍ تاکید وکړ.
